Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
شه‌ممه‌ 30 كانونی یه‌كه‌م 2017

بۆ عەدنان کۆچەر ، پاڵەوانەکەت ساختەیە

بەروار : 30 كانونی یه‌كه‌م 2017
If you thought this page is useful to your friend, use this form to send.
Friend Email
Enter your message

 

 

گۆران هەڵەبجەیی

 

[لەو تاقمە ماستاوچیە، سوک و ڕسواو هیچوپوچتر نیە،کە هەموو عەیبوعارەکانی دەسەڵات دەبینن و کەچی هەر چەپڵەی بۆ لێدەدەن.]

ئەلبەرت کامۆ

 

{گەر نەتتوانی قسەی هەق بکەیت چەپڵەش بۆ ناهەق لێمەدە }

پەندێکی کۆری

 

ماوەیەکە عەدنان کۆچەر ، ئەو کەسەی لای لاهور شێخ جەنگی کاردەکات،کە  نازانم  لەوێ چ کارەیە ،[ پێدەچێت ڕاوێژکاری سەربازی بێت]، بە نووسین کەوتووەتە پیاهەڵدانی لاهور شێخ جەنگی و هەروەها یەکێتی  ،کە نوێترینیان ئەم بابەتە بوو {لێگەڕین  لاهوڕ تالەبانی ئارامی بێنێتەوە }کە لە ماڵپەڕی وتارکورددا لە 12،22 دا بڵاو کرابوویەوە.

 

سەرەتا گومانم لەوە هەیە کە ئەو نووسینانە هی خودی عەدنان بن ، چونکە بەوەی من دەیناسم و ساڵانێک لە چاک پێکەوە کارمان کردووە ،  توانای نووسینی ،بێ هەڵەو بە زمانێکی پاراو   زۆر لاوازە. بەهەرحاڵ با ئەو باسە هەڵگرین بۆ دەرفەتێکی  تر.

 

کەلتوورێکی ناشیرین  لە ڕۆژهەڵاتی نیوندا  لە زۆر بواردا  بەردەوام خۆی  نمایش دەکات، ئەویش کەلتووری خۆ بردنە پێشەوەیە، یا خۆخۆشەویستکردنە لەبەرچاوی سەرووتر ،کە بە زمانە شەعبیەکەی خۆمان پیی دەڵین [ماستاوچی] یا{ شانتەکێن}  ،وە بەعەرەبیش پیی دەڵین[لگلگی].

 

وەک پێشتر ئاماژەم پێدا ئەو  ماستاوچیانە  ئامانجیان تەنها لەیەک شتدا خۆی دەبینێتەوە ، ئەویش  خۆ بردنە پێشەوە، خۆ جوانکردن،و خۆشیرین کردنە لە بەر دیدی بەرپەرسەکانیان{ئاغاکانیان} ، چونکە ئەمانە لە ئەسڵدا هەگەبەی فیکری و مەعریفی و زانستیان  بەتاڵەو هیچ شک نابەن  تا پێگەیەکی شایستەی  پی پڕبکەنەوە   ، هێزی بزووینەرو ئەزموونی ڕابردوویان هێندە هەژارە ناتوانن بگەنە پلەیەک تا پێی بژین ، هاوکات قەناعەتێکی جێگیری ئایدۆلۆجیشیان نیە،لەکن چ حیزبێک پارەی کرد خزمەتەکەیان لەوێ   هەڕاج دەکەن ،بۆیە ناجار پەنا بۆئەو جۆرە کارانە دەبەن تا بەپەیژەی ڕزیودا سەرکەون.

ئاخر ئەمە ئەپەڕی بێڕووییە کەسێک تەنها بۆ خۆبردنە پێشەوە کەسێکی سەرکووتکەر  بکاتە پاڵەوان و فریادڕەس و سۆپەرمان.

 

مەنتەلیتیتی تاکی کورد وایە ،هەر سەرکردەیەک،سەرۆکی حیزبیک   یا پیاوێکی دەسەڵاتدار بچێتە ژینگەکەیانەوە یا باژێڕێکەوە، لەدەوری کۆدەبنەوە و بڕێک لە گەنجەکانیش  سێلڤی لەگەڵدا دەگرن ، .بۆ ڕۆژی دوایی  گەر   کەسێکی نەیاری کەسی یەکەم وە  لە حیزبێکی دژ بچێتە هەمان شوێن ،دیسان هەمان  خەڵک لێی کۆدبنەوە و سێلڤی لەگەڵدا دەگرن. بەڵام   گەر نارەزایی هاتەئاراوە ئەوە هەمان جەماوەر دەچن بارەگاکانیان دەسوتێنن یا بەردبارانیان دەکەن. دیارە ئەمەش  پەیووندی بە ئاستی هۆشیاریەوە هەیە، نەک بەخۆشەوستی تاکەکان بۆ ئەو کەسە یائەو حیزبە.

 

کەواتە پێشوازی کۆمەڵە گەنجێکی ڕانیە   یا هەر باژێڕێکی تر  لە لاهور ،یا هەر کەسێکی دیکە ، ناکرێ بەوە لێکبدرێتەوە کە ئەو زاتە  خۆشەویست و پاک و دلسۆز و پاڵەوانە.

لەگەڵ ڕێزمدا بۆ عومەر کڵۆڵ[سەرۆکی حیزبی کەران] کە تاسەر ئیسقان کەسێکی پاکەو لە زۆر سیاسی فاشل دڵسۆزترە ،گەر ئەویش برواتە رانیە یا هەر باژیریکی تری کوردستان

، لەو بڕوایەدام  لە وەی لاهور زیاتر خەڵک لەدەوری کۆدەبێتەوە ، پاشان کەسیش پروپاگەندەی پاڵەوانیەتی بۆ ناکات.

 

زۆر  سەیرە  لام عەدنان دەڵیت لێگەڕین با لاهور ئارامی بێنێتەوە. ئەز دەپرسم کێ دەستی گرەتووە بۆ نایهێنێتەوە ؟

ئەرێ بەڕاست هیج لەمپەرێک هەیە لەبەردەم لاهوردا ؟ خۆ لە ئیستادا  بە پراکتیک  لاهور و براو ئامۆزاکانی یا درووستر بڵیم بنەماڵەی تاڵەبانی  حوکمی زۆنی سەوز دەکەن و کەس منافسیان نیە .بە ئارەزووی خۆیان بە سەیارەی جام ڕەشی بێ ژمارە لە فڕۆکە خانەوە خەڵک دەفڕینن، کەناڵی تەلەفزیۆن دادەخەن،هێزی دژە تەرۆر بە شەقامەکاندا بڵاو دەکەنەو ،خەڵک دەگرن  ،دۆخی سەربازی دەسەپینن. ئەمانە هیچ حسابێک بۆ  سەرکردایەتی یەکێتی ، بۆ پارێزگار، بۆ  یاساو دادگاو هیچ دامەزراوەیەکی دیکە  ناکەن و خۆیان لەسەری هەموو دەسەڵاتێکەوە دەبیننەوە.

 

جا گەر کەسێک یا چەند کەسێکی دیاریکراو  جڵەوەی دەسەڵاتیان بەدەستەوە بێت و بە خواستی خۆیان وە چۆنیان بوێت بیجوڵینن ،ڕیمۆن کۆنترۆڵ لەدەستی خۆیاندا بیت ،ئەی بۆ چاکی ناکەن ؟چ  ئاستەنگیەک  لە ڕێگەیاندا هەیە؟

 

عەدنان   دەیەویت خۆڵ بکاتە چاوی خەڵکەوە ،دەخوازێت پێمان بڵێت ئەو کارانەی دژ بە خۆپیشاندەران ئەنجامدراون ، یا هەرچی  گەندەڵی ، نادادپەروەری،دزی، بێموچەیی،شکستی سیاسی و سەربازی هەن دەستی  لاهوری تیدانیە و  کەسێکی تاسەرئێسک دڵسۆزو خەمخۆری خەڵکە وە گەر دەسەڵاتی هەبێت بە[ کوون فەیەکونێک]  مەملەکەتی سەوز دەکات  بە شامی شەریف.دیارە عەدنان زۆر کۆڵەوارە لە سیاستدا ،دەنا دەبوو بیزانیایە کەسێک لە ماوەی ساڵانی ڕابردووی  دەسەڵاتی جووت حیزبدا  و تاکو ئەمڕۆش بەشێک بێت لە پێکهاتەی ئەو دەسەڵاتە گەندڵ و فاشل و سەرکووتکەرە، بە تایبەتیش پۆستێکی هەستیاری بەدەستەوە بێت ، بێگومان ناتوانێت ڕەوشەکە چاک بکات ،چونکە خودی  خۆیان هێندە خراپیان کردووە ، کەڵکی چاککردنی نەماوە  .ئەوان تەنها شتێک دەتوانن بیکەن  زیاتر خراپترکردنی ڕەوشەکەیە .

 

خۆ  گەر وا تێفکرێیت کە  هێمنی و ئارامی و سەقامگیری  لە  ڕێگەی بەکارهێنانی هێزو ترس و لوولەی تفەنگەوە فەراهەم دێت،ئەوە زۆر هەڵەیت  ، چونکە ئەوە ئارامیەکی ساختەیەو لە دەرفەتێکی گونجاودا ناڕەزاییەکان لە جۆرەها فۆرمدا سەرهەڵدەدەنەوە  .

من دەزانم عەدنان  کوێی دێشێت ، گەرەکیەتی بەم بابەتانەی  ڕێگە خۆش بکات بۆ لاهور تا  لە ئایندەدا لە نێو یەكێتیدا بگات بەو  پۆستەی کە دەیخوازیت ،ئەم ئەستۆپاکی بۆ دەنووسێتەوە ،لێ ئەستۆپاکیەکی ساختە.

 

لە عەدنان دەپرسم کەسێک خیانەتی لە گەلەکەی کردبێت و پتر لە ٪50 ی خاکی وڵاتەکەی بە دیاری بەخشیبێتە دوژمن ، خاوەنی دەزگایەکی مەترسیدارو سەرکووتکەر بێت ، چۆن دەتوانێت ئارامی ڕاستەقینە مەیسەربکات؟

 

ئاساییە  کەسێک هەر حیزب و ئایدۆلاجیاو ڕیبازێک هەڵدەبژیرێت ،بەلام ئاسایی نیە گەر لە پێناوی ناو  و پۆست و پارەو بەرژەوندیدا ئەو کارە بکات. عەدنان لە خیزانێکی شیوعی چاوی بە دنیا هەڵهێناوە ،باوکی تێکۆشەرێکی  مەزن و خاوەن بیروباوەڕ بوو ،هەر لە پێناوی بیروباوەرەکەیدا  دژی بەعس جەنگاو تا دوافیشەک مقاومەی کرد  وهەر لەوێشدا گیانی خۆی بە خاک و حیزبەکەی  بەخشی  .جا گەر ئیستا  ئەو باوکە قارەمانە بمایە ،بێگومان  بەم هەڵویستەی کوڕەکەیزۆر  نیگەران دەبوو  .

لەکۆتایدا ئێژم ،گەر پارەیەک بە ماستاوکردن بەدەستبێت، ئەوە پارە نیە، بەڵکو  نرخی ڕۆچوونی مۆراڵ و  کەسایەتیە.

 

 

 

 

 

 

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە