یه‌ك شه‌ممه‌ 11 شوبات 2018

ئەم بێباکی وخەمساردیە گشتیە،خەریکەڕۆحمان دەکێشێ

بەروار : 11 شوبات 2018
If you thought this page is useful to your friend, use this form to send.
Friend Email
Enter your message

 

عەبدولڕەحمان عەلی ڕەزا

بێباکی یاخود خەمساردی دوو چەمکن کەدەکرێت زیاتر بەوکەسانە بوترێت کەلە ئاست هەموو ڕوداووپێشهاتەکاندا باش بن یاخراپ بێدەنگی هەڵدەبژێرن وهیچ کۆمێنت وهەڵوێست وکاردانەوەیەکیان لەئاستیدا نیەونابێت .
بێدەنگبونی دەستەجەمعیش لەئاست هەر کردەیەکدا نەخۆشیەکی کوشندەیەو مرۆڤەکان نزیکدەکاتەوە لەکەناری بێهیوابون ودواتریش کێشانی ڕۆحی بەدوادادێت .
لەباشوری کوردستاندا یاخود ئەوەی لەئێستادا پێیدەوترێت هەرێمی کوردستان خەمساردی وبێباکیەکی گشتگیر خەریکە باڵ دەکێشێت بەسەر هەمواندا کەگەر بێت وبەردەوامی هەبێت وردە وردە خۆری هیواکان ئاوادەبن وبەدیهێنانی ئاسۆیەکی ڕوونیش لەمەحاڵ نزیکمان دەکاتەوە.
ئاخەر ئەوە چ کارەساتێکە لەم مەملەکەتەدا دنیایەک ڕووداوو تەنانەت کارەساتیش ڕوودەدات کەچی خەڵکی هەر بێدەنگی هەڵبژاردوە بەشێوەیەک ئەڵێی لەسوڕی متبوندایە .
چەند سەیرە تۆچوار ساڵە نان وقوتی ڕۆژانەت بڕدراوەو ژیانێکی مەمرەومەژی دەبەیتەسەر کەچی هەر بێدەنگیت ، تۆبە داتاو ژمارەی دروست بزانیت لەماوەی سێ ساڵدا یانەکانی ڕیال مەدریدو بەرشەلۆنە گرێبەستیان لەگەڵ چەند یاریزان کردوەوهەریەکەیان چەندییان لەوبوارەدا خەرجکردوە بەڵام خۆت نەزانی چەند مانگە موچەت وەرنەگرتوەو چەندت لێبڕاوەو چەندیشت بۆپاشەکەوتکراوە؟ لەسادەترین وسەرەتایترین مافەکانی ژیانت بێبەشکراویت کەچی هەربێباکیت ، هیچ بەهاوشکۆیەکی مرۆڤایەتیان بۆمرۆڤەکان نەهێشتۆتەوە کەچی تۆهەرخەمساردتردەبیت.
من تێناگەم لەهیچ شوێنێکی دنیادا نەبوەونابێت دامەزراوەی یاسایت پەکبخرێت ، حکومەتت شکست لەدوای شکست تۆماریان بکات ، پەت و تۆڕی ژیانی کۆمەڵایەتیت لەپچڕانی تەواوەتی نزیک ببێتەوە کەچی مێشێک میوانت نیەو لەبێباک بێ باکترو بێدەنگیشت لەلاڵبون نزیکدەبێتەوە .
لەوەش سەیرتر ئەوەیە لەنیوەشەوێکدا زیاتر لەنیوەی خاک وخەڵکی کوردستانت ڕادەستی حەشدی شەعبی وهێزەعێراقیەکان بکرێت وخەڵکێکی زۆریش ئاوارەو دەربەدەری شاران بکرێت تۆهەر سەیرکەربیت و حزبەکانی خاوەن هێزی چەکداریش تەخوینی یەکدی بکەن .
ئاخەر خودایە چ کارەساتێکە بەشێکی کوردستانت ڕووبەڕووی گەورەترین هەڕەشەوهێرش وپەلاماردان بوبێتەوە کەچی خەڵکی لەم هەرێمەوە تەنها ڕۆڵی تەماشاکەر ببینێت وئامەدەش نەبێت وەک پاڵپشتیەک بەشداری گردبونەوەوخۆپیشاندانێکی نیو کاژێری بکات بۆیان .
چ معقوڵیەتێکی تێدایە بەشداربوانی خۆپیشاندان وناڕەزایەتیەکان لەزۆربەی پایتەختەکانی دونیادا دژی پالاماردانی دەوڵەتی تورکیا بۆسەرکانتۆنی عەفرین لەبەشداربوانی پایتەختی هەرێمی کوردستان زۆرتروزیاتربن.
چەند عەجیبە ئەنجومەنی ئاسایش وپەرلەمانی ئەوروپا کۆبونەوەی تایبەت بەبارودۆخی عەفرین بکەن وبەئاشکرا دژی پەلامارەکانی تورکیا بوەستنەوە کەچی لەپەرلەمانەکەی هەرێمی کوردستاندا زاتی ئەوەنەکرێت چەمکەکانی شەڕڤان ویەپەگەویەپەژە ناوبهێنرێت کەلەئێسنادا بونەتە وێردی سەرزاری دونیاو ڕۆژانە داستانی موعجیزەئاسا تۆمار دەکەن ،لەوەش عەجیبتر بێدەنگی و بێسەنگی دەسەڵاتداران وبەرپرسانی حکومەتی هەرێمە لەئاست ئەو قەتل وعام و وێرانکارییانەی دەکرێتە سەرعەفرین ودانشتوانەکەی .
بۆیە ئەو خەمساردی وبێ باکیەی لەئێستاداو لەنێو هەرێمی کوردستان و دانیشتوانەکەیدا هەیەو بەردەوامە بەتەواوەتی لەحاڵەتەوە بۆتە دیاردەو دیاردەیەکی کوشندەو مەترسیداریش کەخەریکە گیان لەهەموان دەکێشێت .

 

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە