Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
شه‌ممه‌ 2 ئازار 2019

ئەم وێنەیەو چەندین پرسیار

بەروار : 02 ئازار 2019
If you thought this page is useful to your friend, use this form to send.
Friend Email
Enter your message

 

 

 

 

گۆران هەڵەبجەیی

دوێنێ لە تۆڕەکۆمەڵایەتیەکان ئەم وێنەیەم چەندین جار کەوتە بەر چاو کە وێنەی هەندێک لە ئەندامانی سەرکردایەتی یەکێتیە  لە بەغداوە بە فڕۆکە  دەگەڕێنەوە بۆ سلیمانی.ئەوەی سەرنجی ڕاکێشام ئەو کۆمەنتانەبوون کە دەربارەی وێنەکە نووسرابوون.

بۆنمونە هەبوو نووسیبووی [هیوادارم فڕۆکەکە بکەوێتە خوارەوەو هیچیان بە ساغی دەرنەچن.]

کەسێکی تر نووسیبووی [جا گەر بە ڕووداوی ئەو فڕۆکەیە بمرن دەبێ بۆ هەریەکەیان {70ملیۆن دۆلار} تەرخان بکرێت بۆ درووستکردنی مۆنۆمەنت بۆی .هەروەها چەندین دۆنم یا گردیک بکرێت بە مەزارگەیان وئەوکاتە ئەرزە نامێنێت و مەگەر خەڵک لە هۆتێلدا بژی.]

یا تێیدا بوو نووسیبووی[ گرنگ ئەوەیە لە کۆڵمان ببنەوە جا چی دەبەن و چیان بۆ درووست دەکرێت کێشە نیە.]

یا هەبوو نووسیبووی[ گەر ئەمانەش بڕۆن ئەوە بەچکەکانیان لەسەر هەمان چەتەیی بەردەوام دەبن ،کەواتە هیچ ڕوونادات.]

ئەوەی زیاتر کاریگەر بوو  کەسێک  لە کۆمەنتەکەیدا نووسیبووی [ خەڵک هێندە ئازاری چەشتەوە بەدەستیانەوە ،هێندە بێزارین لێیان ، گەر منیش لەو فڕۆکەیەدا بوومایە  حەزم دەکرد بکەوێتە خوارەوەو منش بمرم،  بەس تەنها  ئەم جانەوەرانە بمرن و لەکۆڵمان ببنەوە.]

 

منیش دەپرسم :

*چی وای کردوە کە هاوڵاتیان  هێندە ئاواتە خوازی مەرگی سەرکردەکانیان بن؟

*کێ ئەو دیوارە  ئەستوور و بەرزەی لە نێوان خەڵکو بەناو ئەم سەرکردە فاشلانە دا درووست کردووە؟

 

*هۆکار چیە کە  هاوڵاتی بەهیچ جۆرێک هیواو ئومێدی بەم سەرکردانە نەماوە؟

 

*بۆچی  دەمێک باسی دزی و گەندەڵی دەکرێت تەنهاو تەنها پەنجەی تاوان بۆ ئەوانە درێژ دەکرێت؟

 

*ئایا ئەمانە [مەبەستم هەر سەرانی یەکێتی نیە بەڵکو سەرانی پارتیش] ،هەستیان بەوە کردوە کە تا چ ڕادەیەک مەکروهو  قێزەوەنن لەبەرچاوی خەڵک، بەڕادەیەک ئاوات بەمەرگیان بخوازن؟

 

*ئایا نەیاندەتوانی بەجۆریکی تر ڕەفتار بکەن و خۆیان خۆشەویست بکەن لای میللەت؟

 

*لەپاش مردنیان نەوەکانیان  شەرم نایانگریت کە خەڵک لەبری ماتەمینی و شیوەن  خۆشحاڵی دەردەبڕن؟

 

*ئایا نەیاندەتوانی  ببنە نمونەیەکی پاکی سەرکردە . خەڵک لەبری نەفرەت رێزیان لێبگرێت؟

 

*یایا ئەمانە  دەربارەی ژیانی سادەیی و پاکی و جوانی غاندی ماندیلاو جیڤارایان  خوێندوویانەتەوە کە تا  ئێستاش  پڕ خۆشەویستترین سەرکردەی کۆچکردوون  لە جیهاندا لەکن خەڵک؟

 

* ئایا هەرگیز بەخەیاڵتانا گووزەری کردوە یا بۆ  تەنها جارێکیش  لە خۆتان پرسیوە کە  بۆچی  [ بەڕێز  عبدوڵا ئۆجەلان کە ئەویش وەک ئێوە کوردە  ، ئەوە  بۆ ماوەی {20} ساڵە  لە زینداندایە لە ڕەوشێکی سەخت و دژواردا ژیان بەسەردەبات ، خۆشەویسترین سەرکردەی کوردە ،نەک هەر لە کن کورد بەڵکو بووتە کەسایەتێکی خۆشەویست و ڕێزدار لە جیهاندا؟

 

*ئایا نمونەی بەڕێز [ساڵح موسلم]تان لە بەرچاوە کە کوڕێکی شەهیدەو هاوسەرەکەی شەڕڤانە و خۆشی ژیانێکی زۆر سادە دەژی و  لە سادەترین خانوودا نیشتەجێیە و لەسەر دۆشەک دادەنیشێت؟

 

*دەپرسم ئایا خانوەکەی محەمەد ئۆجەلان برای بەڕێز عەبدوڵا ئۆجەلانتان دیوە لە گوندەکەیان کە لە قوڕ دروستکراوە و لە باوکیەوە بۆی ماوەتەوە؟ ئێوەش هەرچی بە خۆی چێشت پێتان بگات کردووتانە بەفیرعەون و شەق لە دۆلار هەڵدەدات.

 

جا کەواتە لاتان سەیر نەبێت کە خەڵک بێزارە لێتان .

من و هەموو تاکێکی کورد ئاواتەخوازبووین  ئەم سەرکردانەمان نمونەی سەرکردەی دڵسۆز بوونایە ، هەردەم لەبیری خزمەتی خەڵکدا بوونایە ،کار و تێکۆشانیان بۆ خۆشگووزەرانی میللەت بوایە ،بۆ سەربەخۆیی و سەرفرازی کوردستان بوایە . بەڵام ئەفسوس ئەوەی بەرژەوەندی کورد و کوردستان و خەڵکە هەرگیز بیریان لێنەکردوەتەوەو لە بەرنامەشیاندا نەبووە.

تەنها خەمیان خەمی پرکردنی گیرفانیان بووە ، تەنها پەرۆشی دزی و تاڵانی سامانی کوردستان و قووتی خەڵکی هەژار بووە.

مەخابن  ئەوان ڕێگە چەوتەکەیان گرت و بەردەوامیشن لەسەری ، جا بۆ خۆ پاکرندنەو لەو زەلکاوەی تێی کەوتون ،گەر بە ئاوی ئاڵتوونیش بشۆرێنەوە هەرپاک نابنەوە ،چونکە کات  درەنگە و خۆشیان ناخوازن خۆیان پاک بکەنەوە . بۆیە منیش دەنگم دەخەمە پاڵ دەنگی ئەو زۆرینەیەی کە بیزارە لێتان و بەدەنگی بڵند دەڵێم :

[بڕۆن بڕۆن ، ئیدی چۆن دەڕۆن بڕۆن ،حەوت بەردیش بەدوتاندا فڕێدەدەم.]

 

 

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە