شه‌ممه‌ 9 ئازار 2019

لەدانمارک باس لە دەرمانی ساختەو ئێکسپایەری کوردستان کرا

بەروار : 09 ئازار 2019
If you thought this page is useful to your friend, use this form to send.
Friend Email
Enter your message

 

 

 

گۆران هەڵەبجەیی

 

 

ڕێکەوتی[3.5 ]لەیەکێک لە گەڕەکەکانی کۆبهاگن میتینێک ڕێکخرا بۆ ژمارەیەک لە پزیشک،دەرمانساز،کارمەندی  بواری تەندرووستی و کەسایەتی ناسراوی بواری مافی مرۆڤ.

ئەم کۆبوونەوەیە  لەلایەن  ڕێکخراویUNIVERSAL PEACE FEDERATION ڕێکخرابوو.

سەرەتا دوو بەرێز دەربارەی کارو چالاکیەکانی فیدراسیۆنەکە و ئامانج و کاری داهاتوویان دووان .پاشان کوورتە فلیمێک  بە نێوی {باڵوێز بۆ ئاشتی} سەبارەت  بە  هەوڵەکانیان لە جیهاندا بۆ دەستەبەرکردنی ئاشتی پەخش کرا[AMBASSADORS FOR PEACE]

 

دوا بڕگە بۆ دکتۆر بەختیار ئەمین بارام بوو  کە ڕێگەی پێدرا  تیشک بخاتە سەر مەسەلەی دەرمانی ساختەو ماوەبەسەر چوو لە کوردستاندا و چۆنیەتی مامەڵەکردن پێیەوە.

لە درێژەی باسەکەیدا ئاماژەی بە ڕێگاکانی هاوردەکردنی دەرمانی ساختە و ئەو کەسە دەستڕۆشت و پلەدارە  حکومی و حیزبیانە کرد کە کۆنترۆڵی ئەو بوارەیان کردوە  و بەردەوام ژەهر دەرخواردی نەخۆش دەدەن.

هەروەها  دەربارەی بەرەنگاربوونەوەی ئەو دەرمانانە دووا و  چۆنیەتی درووستکردنی ئاستەنگی و هەڕەشە لە لایەن مافیاکانی دەرمانەوە  بۆ خودی دکتۆر  ،بەهۆی ئەو هەڵوێستانەیەوە .

لە کۆتایدا باسی  چۆنیەتی لێدان و هەرەشەی کووشت و دەرچوونی  بەخێرایی لە کوردستان و گەرانەوەی بۆ دانمارک کرد کە هۆکارەکەی مەترسی بوو لەسەر ژیانی .

پاشان لەلایەن ئامادەبوانەوە چەندین پرسیار و سەرنج و تیبینی خرانە ڕوو.

ئەوەی  شایانی ئاماژەیە پەرچەکرداری  ئامادەبووان بوو کە دەمیک دکتۆر بەختیار باسی دەرمانی ئێکسپایەر و خراپ و رۆڵی مافیاکانی حیزبی کرد لە ژهراوی کردنی خەڵکی کەم دەرامەتدا. دڵگرانی و ناخۆشی و بێزاری بەسیمای هەندێکیانەوە  دیار بوو   تا ئاستی فرمێسک ڕشتن بۆ ئەو خەڵکە بێدەسەڵاتەی کوردستان.

 

بۆ ئەوەی پتر ئاشانای ئەو میتینگە بین ، چەند پرسیارێک  ئاراستەی دکتۆر بەختیار  دەکەم :

*  پێناسەیەکی ئەم میتینگەمان بۆ بکە و چۆن ڕێکخرا؟

و/ من خۆم ئەندامێکی کۆنی ریکخراوی ئاشتی جیهانیم  ،وە دووساڵە باڵوێزی ئاشتیم وەک ئەندامێکی چالاک بوونم هەیە لەو  ریکخراوە جیهانیەدا. پاش ئەوەی  باسی  رووداوەکەی کوردستانم کرد بۆیان  ، ئیدی ئەوانیش  پێشنیاری ئەم چالاکیەیان خستە بەردەستم و منیش قەبوڵم کرد .

 

* چ پەیوەندیەک لە نێوان بواری پزیشکی ومەسەلەی مافی مرۆڤدا هەیە ؟ واتە  لە نێوان پیشەکەی بەڕێزت و ئەم بەڕێزانەی  میتینگەکەیان سازکردووە؟

و/ بەڵی  پەیوەندی هەیە ،بەوەی ڕێکخراوی ئاشتی جیهانی بەدواچوون  بۆ زۆر کەیس  و بوار دەکات  لەوانە  بواری تەندرووستی کە گرنگیەکی  تایبەتی لای ئەم  ڕێکخراویە  هەیە .هەوڵدەدات کە  هەموو تاکێک لەم جیهانەدا بەشی هەبێت لە دابینکردنی پێداویستیەکانی  تەندرووستی   .جا ئەوەی لە کوردستان دەگوزەرێت پەیوەندیدارە بەم ڕێکخراەوە ، چونکە پێدانی دەرمانی  ساختە  بە نەخۆش دەبێتە هۆی تێکدانی  بەڵانسی تەندرووستی هاوڵاتیان و بەمەش کێشەی کۆمەڵایەتی بە دوا دێت و نا ئارامی دێتە ئاراوە. هاوکات دەرمانی خراپ دەبیتە هۆی پیسبوونی ژینگە.

 

*هیندەی ئاگاداربووم  لە ڕێگەی  باسەکانی بەڕێزتەوە و پاشان مداخەلەو  پرسیارەکانی هەندێک لە ئامادەبوان ، ئەوانەی لەوێ بوون  زانیاری و شارەزاییان دربارەی چۆنیەتی بەڕێوەبردنی هەرێمی کوردستان   و مەسەلەی کۆنترۆڵی مافیا بۆ جومگە سەرەکیەکانی کوردستان پەیدا کرد. واتە ڕووە نەگەتیڤ و ناشیرینەکەی کوردستان نیشاندرا. ئایا ئەمە   بە خراپ لێکنادرێتەوە کە ئەو ئەزموونەی کوردستان لە پێش چاوی بێگانەکان ناشیرین دەکەیت ،کە پێدەچێت پێشتر جۆرێک لە هاوسۆزیان بۆ خەڵکی کوردستان هەبووبێت . وە ئایا  نیشاندنی ئەم وێنە تەڵخە نابێتە هۆی کەم کردنەوەی داکۆکی و پشتگیری بۆ کورد لەو بەشەی کوردستاندا؟

 

و/  بە بۆچوونی من دو شتی جیاواز لە ئارادا هەیە ،. یەکەم هاوسۆزی و پشتگیری  خەڵکی بێگانە پەیوەندی بەڕەوایی دۆسیەکەمانەوە هەیە ،واتە تا دۆسیەکەمان چارەسەر نەکرێت ئەو پڵپشتی و هاوسۆزیە هەر دەمێنێت. مەسەلەی دووەم ئەوانە باش دەزانن کە ئەم کارە قیزەوەنە، کاری باندێک  یا گروپێک  یا کەمینەیەکە  کە هیچ دڵسۆزی و خەمخۆریەکیان بۆ نەتەوەکەیان نیەو تەنها ئامانجیان کۆکردنەوەی پارەیە  لەسەر حسابی تەندرووستی خەڵکە بێدەسەڵاتەکە.   جا  جۆری ئەم نوخبە گەندەڵ و زیانبەخشە دەشی لە زۆر وڵاتدا هەبن ،بۆیە ناکرێت ئەم  چەشنە کارە مەترسیدارانە  بخرینە پاڵ نەتەوەیەک .

 

* لە کوردستان  هەرچی دەکرێت بۆ بەرەنگار بوونەوەی گەندەڵی ،سود و ئاکامێکی ئەوتۆی نابێت ، بە بڕوای بەڕێزت ناکرێت لە دەرەوە فشارێکی هەمە لایەنە بۆ سەر دەسەڵا ت و بازرگانانی کورد درووستبکرێت تا  ئەو کارانە نەکەن؟  چونکە ئەزموونی ڕابردوو دەری خستووە کە دەمێک لەدەرەوە فشاریان بۆ دێت بە جددی وەری دەگرن .وە ئایا ناکرێت ئەم میتینگە بەیەکێک لەو هەوڵانە پێناسە بکەین؟

و/  بەڵێ تا ڕادەیەک ڕاستە کە فشار و ناڕەزاییەکانی ناوەوە ئاکامێکی ئەوتۆی نیەو نابێت  بۆ کەم کردنەوەی ئەو کارە نامرۆڤانە . دەبوو پزیشەکان بەتووندی دژ بەم جۆرە کارانە بوەستنەوە چونکە پەیوەندی ڕاستەوخۆی بەوانەوە هەیە، بەڵام بەداخەوە هەندێک لە پزیشەکان بەهۆکاری جیاواز چاوپۆشی لەمە دەکەن ،کە نەدەبوو بیکەن چونکە ئەوانە سوێندی پزیشکیان خواردوە کە بە سوێندی [ئۆسلۆ ]ناسراوە کە  بەکوورتی دەڵیت  گەرەکە پزیشک پارێزگاری لە مۆراڵ و شەرەفی پیشەکەی بکات . نابێت درۆ لەگەڵ نەخۆش بکات و دەرمانی ساختەی بۆ بنووسێت.دەمێک  دکتۆرێک دەزانیت ئەودەرمانەی بۆ نەخۆشی دەنوسیت  ساختەیە  ، ئەمە دەچێتە خانەی خیانەت کردن لە پیشەکەی .  سەبارەت بە فشاری دەرەوەش ،ئێمە هەوڵەدەین فشاری دەرەوەمان چالاکاتر بکەین ، ئەم میتیگەش سەرتای کارەکانمان دەبێت   و  بەردەوام دەبین و ساردنابینەوە ،چونکە دەزانین فشاری دەرەوە کاریگەری  باشی هەیە لەسەر گەندەڵکاران.

دەمەوێت بلێم ئیمرۆ لە کوردستان شێرپەنجەیەک بوونی  هەیە ئەویش شێرپەنجەی  پیسکردنی ژینگەی کوردستانە بە دەرمانی خراپ  ، کە کاردەکاتە سەر  تێکدانی  تەندرووستی مرۆڤ . جا بۆیە دەڵیم  گرنگە ئەمە لە هەمووشوینێک باسبکرێت.

وە  پەیوەست بەم مەسەلەوە ،هەنگاوی داهاتوومان پەیوەستکردنی ریکخراویکەمانە {ڕێکخراوی بەگژاچوونی دەرمانی ساختە} بە ڕێکخراوی نەتەوە یەکگرتوەکانەوە ،واتە دەمانەوێت بجینە ژێر چەتری {ڕێکخراوی تەندرووستی جیهانی تایبەت بە نەتەوەییەکگرتووەکان. }

 

 

 

 

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە