هه‌ینی 15 ئازار 2019

تاوانی یەکێتی و پارتی و حسک و ئیسلامیەکان لە هەڵەبجە

بەروار : 15 ئازار 2019
If you thought this page is useful to your friend, use this form to send.
Friend Email
Enter your message

 

 

 

جەلال هۆرێنی

 

 

رژێمی بەعسی دیکتاتۆر بۆ زاڵبوونی دەسەڵاتی خۆی لەناوچەکە،لەبەرامبەر سوپای پاسدارانی ئێران و هێزە کوردیەکان ،بەدوای بیانوو دەگەڕا،بۆ ئەوەی رێگری بکات لەهاتنە پێشەوەی دوژمنەکانی کە یەکێکیان ووڵاتێکی گەورەی وەک ئیران بوو، لەچەند لایەکەوە دەیویست بەشێک لەخاکی عیراق داگیر بکات .

 

ئێرانیش بۆ لاوازکردنی سوپای عیراق و مەشغوڵکردنی  لە کوردستان ،بۆ ئەوەی وەڵامدانەوەی سوپای عێراق بێت کە ناوچەکانی کرماشان و شارۆچکەکانی سەرپێڵی زەهاو و قەسری شیرین و ناوچەی سولاسی باوەجانی و دالەهۆی داگیرکردبوو، ئێران دەیویست سود لە هێزە کوردیەکانی نزیک لەخۆی وەربگرێت بیتە ناو هەڵەبجە.

 

 

رۆڵی حزبەکان لەهاوکاریکردنی ئێران بۆ ناو هەڵەبجە

 

سوپای پاسدارانی ئیران لەگەڵ  یەکێتی و پارتی و بزووتنەوەی ئیسلامی و حسک کۆبونەوەی بەردەوامی هەبوو،  بۆ ئەوەی پلانێک دابنێن بۆ چوونە ناوەوەی سوپای ئیران بۆ هەڵەبجە،پلانەکەیان کاتژمیری سفریان دانابوو، بەشیوەیەک هێزە کوردیەکان رێگای بەردەم سوپای ئیران چۆڵ بکەن ،واتە بەکرێ گیراوبوون ،

یەکێتی هاوکار و چاوساغی هیزێکی سوپای ئێرانی دەکرد لەناوچەی هاوار و شنروی و ناوشاری هەڵەبجە، پارتی لەگەل هێزێکی پاسداران لە ناوچەی هەورامان بوو ، هێزەکانی حسک بەسەرپەرشتی کاکە حەمە لەناوچەی سورێن و شارەزووربوون بۆ گرتنی رێگای پردی زەڵم لەگەڵ هیزی بزووتنەوەی ئیسلامی بەسەرۆکایەتی مەلا عەلی .

 

 

پێنج رۆژ پێش کیمیاباران چی روویدا؟

 

 

شەوی ١١ی ٣ هێزەکانی یەکێتی و سوپای پاسداران دەچنە ناو شاری هەڵەبجە ،بەشێکی گرنگی ناو شار دەگەرێن ،لەشەوی ١٢ی ٣ شاری هەڵەبجە بەتەواوەتی دەکەوێتە دەست سوپای پاسداران، هێزەکەی یەکێتیش دەست بەسەر بانک و پۆلیس و دامودەزگاکانی بەعس دەگرێت،هەمان شەو هێزەکەی ئیران و پارتی ناوچەی هەورامان دەگرن و هیزەکانی حسک ناوچەی سورێن و شارەزوو دەگرن و پردەکەی نێوان هەڵەبجە و سەیدسادق دەتەقێنەوە بۆ ئەوەی کەس نەپەرێتەوە*.

تاوەکو رۆژی ١٦ی مانگ هەموو هێزەکان لەناو هەڵەبجە و هەورامان و شارەزووربوون کە هێزە کوردیەکان بەکرێ گیراوی سوپای ئێران بوون .

 

 

کێ رێگری کرد لەچوونە دەرەوەی خەڵک

 

 

کاتێک لەشەوی ١١ لەسەر ١٢ی ٣ سوپای پاسداران هاتنە ناو هەڵەبجە ،خەڵکی هەلەبجە لەترسی هیرشەکانی حکومەتی بەعس ویستیان شارەکە بەجێ بهێڵن ،بەشێک لەو خەڵکە لەناوچەی هاوا و شنروی ویستیان برۆن هێزەکانی یەکێتی رێگای پێنەدەدان و دەیگەڕاندنەوە، لەوەشەوە هێزەکانی حسک و ئیسلامیەکان رێگای بەکەس نەدەدا لەشار بچێتە دەرەوە.هۆکاری زۆربوونی شەهیدەکانی هەڵەبجە حزبە کوردیەکانی وەک یەکێتی و حسک و ئیسلامیەکان و پارتی بوو.

 

 

دزی و پارەی بانک و کتێبخانە

 

 

لەشەوی ١٢ی مانگ هێزەکانی یەکێتی دەستیان بەسەر بانکی هەڵەبجە گرد،کەلەو کاتەدا دیناری عێراقی بەبەهای دووملیۆن دۆلاری ئەمریکای تێدابوو، هەموویان برد،جگە لەوەش هەموو هێزەکان دەستیان کرد بەدزیکردن  لەماڵان و برینەوەی دەستی ئافرەتان لەدوای ١٦ی ٣بۆ بردنی ئەڵقەی ئاڵتون ،لەوکاتەدا کتێبخانەی هەڵەبجە ١٣ هەزار کتێبی تێدابوو ،کە سەرچاوەی عەربی ئینگلیزی و کوردی کە کتێبی نایاب بوون هەمووی درا بە ئێران و تا ئێستا نەگەراوەتەوە، گومان دەکرێت ئەو کتێبانە لەلایەن یەکێتیەوە فرۆشرابێت بە حکومەتی ئێران لەو کاتەدا.

 

زانیاری تر

 

کاکە حەمەی حاجی مەحمود کە سەرپەرشتی هێزەکەی حسکی دەکرد (مولازم خالید ) کەبەرپرسی ئەمنی هەڵەبجە بوو دەرکرد و لای خۆی کردی بە پێشمەرگە.

هێزەکانی کۆمەڵەی ئیران زیاتر لە ٧٠ شەهیدیان دا لەکاتی بۆردومان کردنەکەدا *.

 

 

ئێستا چی روودەدات؟

 

لەماوەی ٣٠ سالدا هەموو ساڵیک هێزە کوردیەکان یادی هەڵەبجە دەکەنەوە،خۆیان دەکەنە خاوەنی کەس و کاری هەڵەبجە ،لەکاتێکدا خۆیان بەشێک بوون لەتاوانەکانی کیمیابارانکردنی هەڵەبجە، ئەم حزبە کوردیانە بەتایبەت یەکێتی و پارتی و ئیسلامیەکان لەساڵی نەوەدەکانیش ،بەهۆی شەری ناوخۆی نیوان هێزەکان هەڵەبجەیان کردبوە وێسگەی ململانیەی خۆیان ، بەجۆرێک ئەو شارەیان دواخست کە ئاسەوارەکانی تا ئێستا ماوە، رۆژانەش کادیرە گوێرایەلەکانی ئەو سێ حزبە دێن قسەی بریقە دار باس دەکەن بۆ خەڵک ،وەک ئەوەی ئەوانیش وەک حزبی بەعس و سەدام تاوانیان نەکردبێت..

 

 

سەرچاوەکان:

  • کتێبی ئاوارەکانی بناری ئەودیوی چیا :ئاسۆ بیارەیی.
  • ماڵپەری خەندان
  • چەند کەسایەتێکی هەڵەبجە
ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە