Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
هه‌ینی 7 حوزه‌یران 2019

لە ڕاگرتنی شەڕی میدیاییەوە بۆ كۆبوونەوەی لوتكە

بەروار : 07 حوزه‌یران 2019
If you thought this page is useful to your friend, use this form to send.
Friend Email
Enter your message

 

 

ئومێد بابان

 

دوای راگەیاندنی ئەنجامی فەرمیی هەڵبژاردنە پەرلەمانییەكەی 30ی ئەیلوولی ساڵی ڕابردووی پەرلەمانی كوردستان لەلایەن كۆمسیۆنی باڵای سەربەخۆی هەڵبژاردن و راپرسییەوە، بە هۆكاری جیاجیا ناكۆكی كەوتە نێوان لایەنە سیاسییە براوەكانەوە و پێكهێنانی حكوومەت پتر لە 250 رۆژ دواكەوت.

 

ناكۆكییەكەش سەرەتا لەسەر پۆست و بەركەوتەكانی كورد لە بەغدا دەستی پێكرد و دواتریش پرسی كاراكردنەوەی سەرۆكایەتیی هەرێم و هەڵبژاردنی پارێزگارێكی كورد بۆ كەركووك، بوونە خاڵی ناكۆك و جێی مشتومڕ و رای پێچەوانە، كە تەنانەت بارگرژی و شەڕی میدیاییشی لێ كەوتەوە، بەڵام دواجار پاش گفتوگۆ و لێكتێگەیشتن و واژۆكردنی رێككەوتننامە لە نێوان لایەنەكاندا، بەشێكیان یەكلا بوونەوە و ماوەتەوە دەستنیشانكردنی پارێزگارێك بۆ كەركووك و بەشداریكردنی پەرلەمانتارانی یەكێتیی نیشتمانی لە كۆبوونەوەكانی پەرلەماندا بۆ سوێندخواردنی سەرۆكی هەرێم و سەرۆكی ئەنجوومەنی وەزیران.

 

ئەگەرچی پۆستە وەزارییەكان لە كابینەی نۆیەمدا لە نێوان لایەنە براوەكاندا یەكلا بوونەتەوە و رۆژی 10ی ئەم مانگەش سەرۆكی هەرێم سوێندی یاسایی دەخوات، بەڵام هێشتا یەكێتیی نیشتمانیی كوردستان بڕیاری كۆتایی نەداوە و رێككەوتنیشی لەگەڵ پارتی دیموكراتی كوردستاندا، پەیوەست كردووە بە رێككەوتن لەسەر دیاریكردنی پارێزگاری كەركووك، كە پشكی یەكێتیی نیشتمانییە.

 

لە دنیای سیاسەتدا باوە، مافی هەموو حزبێكە بەپێی بەركەوتەی هەڵبژاردن داوای پۆست بكات و وەڵامدەرەوەی خواستی دەنگدەرانی بێت، بەڵام بۆ بیرهێنانەوە، خەریكە كاتی گفتوگۆ و كۆبوونەوە و گەنگەشەی دۆستانە و برایانە درەنگ دەبێت، دروستە كە لە سۆنگەی هەستكردن بە لێپرسراوێتی، شەڕی میدیایی ڕاگیراوە و پارتی دیموكراتی كوردستانیش، وەك هاوبەشێكی راستەقینە سەیری یەكێتیی نیشتمانیی كوردستان دەكات و سەنگ و پێگەی یەكێتیشی نادیدە نەگرتووە، بەڵام بەوپێیەی بارودۆخی كوردستان و ناوچەكە هەستیارە، هەردوولا پێویستیان بە سازشكردن و لێكنزیكبوونەوە و لێكتێگەیشتن و رێككەوتنی كۆتایی هەیە، چونكە ئەمری واقیعە و بە دەنگی خەڵك، ئیدارەدانی ئەم هەرێمە بەو دوو حزبە و هەروەها حزبە براوەكانی دیكەش سپێردراوە.

 

بە سەرنجدان لە دۆخی ناوچە كوردستانییەكان و بە تایبەت كەركووك و خانەقین و مەخمووریش، كە زۆر ناهەموارە و لە تەعریبكردن و بەسەربازگەكردنەوە، بۆ سووتاندنی دەغڵودانی جووتیارانی كورد پەلی كێشاوە، دەكرێ پتر و زووتر و جددیتر خەم لە چارەسەركردنی خێرای دۆخەكە بخورێت، كە ئەوەش وەستاوەتە سەر كۆبوونەوەی بەپەلەی سەركردایەتیی یەكێتی و پارتی، كە دەتوانن بڕیاری یەكلاكەرەوەی لەبارەوە بدەن و پێكەوە و بە هەماهەنگیكردن لەگەڵ پێكهاتەكانی دیكە، هەم ئەنجوومەنی پارێزگای كەركووك كارا بكەنەوە و پارێزگارێك هەڵبژێرن، هەم ئیدارەیەكی هاوبەشی ئەو شارە و ناوچەكانی دیكە بدەن و ئومێدێكیش بۆ خەڵكی كوردستان بگێڕنەوە.

 

ماوەتەوە بڵێین، پارتی و یەكێتی، كە (یەكەم و دووەم) براوەی هەڵبژاردنی ئەمجارەی پەرلەمانی كوردستانن و خاڵی هاوبەشی زۆریشیان لە نێواندان، ئەزموونیان لە حوكمڕانیدا هەیە و پێویستە هەرچی زووتر و پێش 10ی ئەم مانگە، لەسەر ئاستی لوتكە و مەكتەب سیاسی و سەركردایەتیی هەردوولا، كۆببنەوە و رێككەوتنێكی كۆنكرێتی واژۆ بكەن و سێ سەرۆكایەتییەكەی هەرێمی كوردستانیش بخەنەوە سەر سكەی خۆی.

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە