پێنج شه‌ممه‌ 16 ئازار 2017

بۆ هەڵەبجە؟

بەروار : 16 ئازار 2017
If you thought this page is useful to your friend, use this form to send.
Friend Email
Enter your message

 

تەها سلێمان
هەرچى بنوسرێ بۆ جینۆسایدو کیمیابارانى هەڵەبجە، هێشتا نااتە دڵۆپێک رووبارى خوێنى تاوانەکە؟ بەڵکو ئەوەى دواى تاوانەکە کە نەمانکردوەو بەرپرسیارین لە ئەنجام نەدانى، ئەوەیە لێکۆڵینەوەو توێژینەوەو دۆکۆمێنتکردنمان، وەک هەموو لایەنەکانى ترى ژیان خوێن ساردانە بەرێکردوە. ئەم بەرێکردنە بەدرێژایى مێژوو بوەتە مۆتەکەو لە بەرۆکمان نەبوەتەوە؟!
دەنا بۆچى ئێستا ئێمە سەدان کتێبمان لەسەر “جینۆسایدو کیمیابارانکردنى هەڵەبجە، کاریگەرییە سیاسییەکانى، کاریگەرییە ئابورییەکانى، کاریگەرییە بۆ ماوەییەکانى، کاریگەرییە درێژخایەنەکانى، کاریگەرییە کلتوورى و فەرهەنگییەکانى، کاریگەرییە کۆمەڵایەتیەکانى، کاریگەرییە ژینگەییەکانى، شەهیدو بریندارەکانى، بێسەروشوێنبوەکانى، دۆسییەى هەڵەبجە لەدادگا، دۆسیەى هەڵەبجە لە سەر سەکۆى نێودەوڵەتى”و زۆر لایەنى ترى نەبێت؟!
ئێستاش لە هەڵەبجەدا، بۆنى گازى سیانیدو خەردەل و ڤى ئێکس و بۆمبى ناپاڵم و بۆمبى تەقلیدى دێ؟ چى کراوە بۆ ئەوەى هەڵەبجە بکرێتەوە بە وێنە راستەقینەکەى خۆى؟ ئایا توانیومانە لە هەڵەبجەو دەوروبەریدا، بەهاى ژیان دروست بکەینەوە؟ توانیومانە پەیامى مرۆڤ دۆستى بچەسپێنین؟ توانیومانە سەرخان و ژێرخانى شارەکە لە ئاستى پێویستا ببوژێنینەوە؟ توانیومانە شارەکە لە بۆنى تاعونى گازى مرۆڤ کوژ پاک بکەینەوە؟ توانیومانە ناوى راستەقینەى گومناوەکان بخەینەوە سەر دەفتەر نفوسەکانیان؟ توانیومانە دڵى مرێم و عەلى و زمناکۆکان رابگرین؟
کوا مۆزەخانەى جینۆسایدو کیمیابارانکردنى هەڵەبجە؟ ئایا تەنها مۆنۆمێنتى هەڵەبجە بەس و خاڵى کۆتاییە؟ کوا دەزگاى یادەوەرى و لێکۆڵینەوەو توێژینەوە بۆ هەڵەبجە؟ کوا هەڵەبجە لە مەنهەجى پەروەردەو خوێندندا؟ کوا هەڵەبجە لەپێش و پاش بەپارێزگابوونى، بودجەى پێویست بۆ ئاوەدانکردنەوەى؟ ئاخر شەرم نیە پڕۆژەى ئاوەدانکردنەوەو خزمەتگوزارییەکانى هەڵەبجە بە پاساوى قەیرانى دارایى رابگیرێن؟
ئەگەر ئەم پرسیارانەى ئێمە دەیکەین، راست نین و خنجێر لەکادانە، فەرموون ئەوە پارێزگارى هەڵەبجە، ئەوە قایمقامى هەڵەبجە، ئەوە بەڕێوەبەرى شارۆچکەکانى هەڵەبجە، ئەوە بەرێوەبەرە گشتیەکانى هەڵەبجە، ئەوە رێکخراوەکانى کۆمەڵگاى مەدەنى لە هەڵەبجە، ئەوە حزبە سیاسییەکان لە هەڵەبجە، پرسیاریان لێبکەن؟ دڵنیام ئاسان وڵامەکان وەردەگرنەوە. بەڵام ئەگەر حکومەت نەیەوێ ئەمە بکات و هەڵەبجە بەم دۆخەوە جێبێڵێ؟ ئەوە عەیبەیەکى گەورەیە باسى بە پارێزگابوونى هەڵەبجەو سیمبولبونى و ناوەزەدکردنى وەک پایتەختى ئاشتى، بە دەستکەوت بکرێ؟

ناردنی ئەم بابەتە بۆ تۆرەکۆمەڵایەتیەکان

ریزبەندی بابەت

0 بۆچوون تۆمارکراوە



تۆی بەریز دەتوانیت بۆچوونی خۆت لەسەر ئەم بابەتە دەرببڕیت بە پرکردنەوەی ئەم فۆرمە